ଶ୍ରୀଜଗନ୍ନାଥାଷ୍ଟକ

କଦାଚିତ୍ କାଳିନ୍ଦୀତଟ-ବିପିନ-ସଂଗୀତକ-ରବୋ 

ମୁଦାଭୀରୀନାରୀ ବଦନକମଳାସ୍ବାଦମଧୁପଃ।

ରମାଶଂଭୂବ୍ରହ୍ମାମରପତି ଗଣେଶାର୍ଚ୍ଚିତପଦୋ

ଜଗନ୍ନାଥଃ ସ୍ବାମୀ ନୟନପଥଗାମୀ ଭଵତୁ ମେ  || ୧ ||

ଭୁଜେ ସବ୍ୟେ ବେଣୁଂ ଶିରସି ଶିଖିପିଚ୍ଛଂ କଟିତଟେ

ଦୁକୂଲଂ ନେତ୍ରାନ୍ତେ ସହଚର-କଟାକ୍ଷଂ ବିଦଧତେ।

ସଦା ଶ୍ରୀମଦ୍-ବୃନ୍ଦାବନ-ବସତି-ଲୀଳା-ପରିଚୟୋ

ଜଗନ୍ନାଥଃ ସ୍ବାମୀ ନୟନପଥଗାମୀ ଭବତୁ ମେ  || ୨ ||

ମହାମ୍ଭୋଧେସ୍ତୀରେ କନକରୁଚିରେ ନୀଳଶିଖରେ

ଵସନ୍ ପ୍ରାସାଦାନ୍ତଃ ସହଜ ବଳଭଦ୍ରେଣ ବଳିନା।

ସୁଭଦ୍ରାମଧ୍ୟସ୍ଥଃ ସକଳସୁରସେବାବସରଦୋ

ଜଗନ୍ନାଥଃ ସ୍ବାମୀ ନୟନପଥଗାମୀ ଭବତୁ ମେ || ୩ ||

କୃପାପାରାବାରଃ ସଜଳଜଳଦଶ୍ରେଣିରୁଚିରୋ

ରମାବାଣୀରାମଃ ସ୍ଫୂରଦମଳପଙ୍କେରୁହମୁଖଃ।

ସୁରେନ୍ଦ୍ରୈରାରାଧ୍ୟଃ ଶ୍ରୁତିଗଣଶିଖା ଗୀତଚରିତୋ

ଜଗନ୍ନାଥଃ ସ୍ବାମୀ ନୟନପଥଗାମୀ ଭବତୁ ମେ || ୪ ||

ରଥାରୂଢ଼ୋ ଗଚ୍ଛନ୍ ପଥି ମିଳିତ ଭୂଦେବପଟଳୈଃ

ସ୍ତୁତିପ୍ରାଦୁର୍ଭାବଂ ପ୍ରତିପଦମୁପାକର୍ଣ୍ଣ୍ୟ ସଦୟଃ।

ଦୟାସିନ୍ଧୁର୍ବନ୍ଧୁଃ ସକଳଜଗତାଂ ସିନ୍ଧୁସୁତୟା

ଜଗନ୍ନାଥଃ ସ୍ବାମୀ ନୟନପଥଗାମୀ ଭବତୁ ମେ || ୫ ||

ପରବ୍ରହ୍ମାପୀଡ଼ଃ କୁବଳୟ-ଦଳୋତ୍ଫୁଲ୍ଲ-ନୟନୋ

ନିବାସୀ ନୀଳାଦ୍ରୌ ନିହିତ-ଚରଣୋଽନନ୍ତ-ଶିରସି।

ରସାନନ୍ଦୀ ରାଧା-ସରସ-ବପୁରାଲିଙ୍ଗନ-ସୁଖୋ

ଜଗନ୍ନାଥଃ ସ୍ବାମୀ ନୟନପଥଗାମୀ ଭବତୁ ମେ  || ୬ ||

ନ ବୈ ଯାଚେ ରାଜ୍ୟଂ ନ ଚ କନକମାଣିକ୍ୟ ବିଭବଂ

ନ ଯାଚେଽହଂ ରମ୍ୟାଂ ନିଖିଳଜନକାମ୍ୟାଂ ବରବଧୂମ୍।

ସଦା କାଳେ କାଳେ ପ୍ରମଥପତିନା ଗୀତଚରିତୋ

ଜଗନ୍ନାଥଃ ସ୍ବାମୀ ନୟନପଥଗାମୀ ଭବତୁ ମେ || ୭ ||

ହର ତ୍ବଂ ସଂସାରଂ ଦ୍ରୁତତରମସାରଂ ସୁରପତେ

ହର ତ୍ବଂ ପାପାନାଂ ବିତତିମପରାଂ ଯାଦବପତେ

ଅହୋ ଦୀନେଽନାଥେ ନିହିତଚରଣୋ ନିଶ୍ଚିତମିଦଂ

ଜଗନ୍ନାଥଃ ସ୍ବାମୀ ନୟନପଥଗାମୀ ଭବତୁ ମେ || ୮ ||

ଜଗନ୍ନାଥାଷ୍ଟକଂ ପୁଣ୍ୟଂ ଯଃ ପଠେତ୍ ପ୍ରୟତଃ ଶୁଚିଃ।

ସର୍ବପାପବିଶୁଦ୍ଧାତ୍ମା ବିଷ୍ଣୁଲୋକଂ ସ ଗଚ୍ଛତି || ୯ ||

ଇତି ଶ୍ରୀମତ୍ ଶଙ୍କରାଚାର୍ଯ୍ୟବିରଚିତଂ ଜଗନ୍ନାଥାଷ୍ଟକଂ ସମ୍ପୂର୍ଣ୍ଣମ୍।

                ????ଜୟ ଜଗନ୍ନାଥ????