ବିରଳ ଅଲିଭ୍ ରିଡ୍ଲେ କଇଁଛଙ୍କୁ ସୁରକ୍ଷା ଯୋଗାଉଛନ୍ତି ରବୀନ୍ଦ୍ର
ସଂଗୃହୀତ
ବର୍ଷେ କି ଦୁଇବର୍ଷ ନୁହେଁ, ଦୀର୍ଘ 30ବର୍ଷ ହେଲା ବିରଳ ଅଲିଭ୍ ରିଡ଼ଲେ କଇଁଛଙ୍କୁ ସୁରକ୍ଷା ଯୋଗାଉଛନ୍ତି ଗଞ୍ଜାମ ସଦର ବ୍ଳକ୍ ପୁରୁଣାବନ୍ଧ ଗ୍ରାମର ରବୀନ୍ଦ୍ରନାଥ ସାହୁ | ନିଜସ୍ବ ଉଦ୍ୟମରେ ଋଷିକୁଲ୍ୟା ସମୁଦ୍ର କଇଁଛ ସୁରକ୍ଷା ସମିତି ନାମରେ ଏକ ଅନୁଷ୍ଠାନ ଗଠନ କରି ସ୍ବେଚ୍ଛାସେବୀଙ୍କୁ ସେଥିରେ ସାମିଲ କରିଛନ୍ତି | ଋଷିକୁଲ୍ୟା ମୁହାଣ ସଂଲଗ୍ନ ବାଲୁକା ଶଯ୍ୟାରେ ପ୍ରତିବର୍ଷ ଗଣ ଅଣ୍ଡାଦାନ କରୁଥିବା କଇଁଛଙ୍କ ସୁରକ୍ଷା ପାଇଁ ଏହି ଯୁବ ପରିବେଶବିତ ଲୋକଙ୍କ ମଧ୍ୟରେ ସଚେତନତା ମଧ୍ୟ ସୃଷ୍ଟି କରୁଛନ୍ତି |
ଗଞ୍ଜାମ ବ୍ଲକ୍ ପୁରୁଣାବନ୍ଧ ଗ୍ରାମର କିଛି ଯୁବକ ବିରଳ ବନ୍ୟପ୍ରାଣୀଙ୍କ ସୁରକ୍ଷା ପାଇଁ କାମ ଆରମ୍ଭ କରିଥିଲେ | 1994ରୁ ସେହି ଯୁବକମାନେ ଋଷିକୁଲ୍ୟା ମୁହାଣକୁ ଆସୁଥିବା ସାମୁଦ୍ରିକ କଇଁଛ, ବିଦେଶାଗତ ପକ୍ଷୀଙ୍କ ସୁରକ୍ଷା ଦାୟିତ୍ବ ହାତକୁ ନେଇଥିଲେ | ସେହିପରି ଘରଚଟିଆ, କୃଷ୍ଣସାର ମୃଗ ଓ ବାୟା ଚଢେଇର ସଂରକ୍ଷଣ ଏବଂ ସୁରକ୍ଷା ଦିଗରେ ଲୋକଙ୍କୁ ସଚେତନ କରି ଆସୁଛନ୍ତି | ବିଶେଷ କରି ରବୀନ୍ଦ୍ର ଓ ତାଙ୍କ ଟିମ୍ ଅଲିଭ୍ ରିଡ୍ଲେ କଇଁଛଙ୍କ ସୁରକ୍ଷାକୁ ଅଗ୍ରାଧିକାର ଦେଇଛନ୍ତି | ଏଥିପାଇଁ 1998ରେ ଋଷିକୁଲ୍ୟା ସମୁଦ୍ର କଇଁଛ ସୁରକ୍ଷା ସମିତି ନାମରେ ଏକ ଅନୁଷ୍ଠାନ ଗଠନ କରାଯାଇଥିଲା ଯାହାର ସମ୍ପାଦକ ରହିଛନ୍ତି ରବୀନ୍ଦ୍ର | ରବୀନ୍ଦ୍ରଙ୍କ ନେତୃତ୍ବରେ ଗାଁର ଯୁବକମାନେ ଏହି କାର୍ଯ୍ୟକ୍ରମରେ ନିୟୋଜିତ ରହିଛନ୍ତି | ଆଖପାଖ ଗାଁର ଲୋକମାନେ ମଧ୍ୟ ଏଥିରେ ସହଯୋଗ କରୁଛନ୍ତି | 90 ଦଶକରେ କିଛି ଲୋକ କଇଁଛ ଅଣ୍ଡା ବିକ୍ରି କରିବା ସହିତ ଖାଉଥିଲେ | ଏହି ସମିତିର କର୍ମକର୍ତ୍ତା ମାନେ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ପରେ ତାହା ସମ୍ପୂର୍ଣ୍ଣ ବନ୍ଦ ହୋଇଯାଇଛି | ସମିତିର କର୍ମକର୍ତ୍ତା ଗଞ୍ଜାମର ପ୍ରୟାଗୀଠାରୁ ସୁନାପୁର ପର୍ଯ୍ୟନ୍ତ ଲମ୍ବିଥିବା ପ୍ରାୟ 58କିମି ଉପକୂଳ ଅଞ୍ଚଳର ବାସିନ୍ଦା, ମତ୍ସ୍ୟଜୀବୀ ଓ ଗ୍ରାମବାସୀଙ୍କୁ କଇଁଛଙ୍କ ସୁରକ୍ଷା ପାଇଁ ରୀତିମତ ସଚେତନ କରି ଆସୁଛନ୍ତି |
ଓଡିଶା ଉପକୂଳକୁ 5ଟି ପ୍ରଜାତିର କଇଁଛ ଆସୁଥିବା ବେଳେ ଏମାନଙ୍କ ମଧ୍ୟରେ ଅଲିଭ୍ ରିଡ୍ଲେଙ୍କ ସଂଖ୍ୟା 99 ପ୍ରତିଶତ ବୋଲି କହିଛନ୍ତି ରବୀନ୍ଦ୍ର | ଦୀର୍ଘ 3 ଦଶନ୍ଧି ଧରି ସମୁଦ୍ର କଇଁଛଙ୍କ ପାଇଁ କାମ କରିବା ଅବସରରେ ରବୀନ୍ଦ୍ର ବିଭିନ୍ନ ଅନୁଷ୍ଠାନରୁ ପୁରସ୍କୃତ ମଧ୍ୟ ହୋଇଛନ୍ତି | ରବୀନ୍ଦ୍ର ନିଜସ୍ବ ଉଦ୍ୟମରେ ଗଞ୍ଜାମ ଜିଲ୍ଲା ସମେତ ଖୋର୍ଦ୍ଧା, ଅନୁଗୁଳ, ସୁନ୍ଦରଗଡ, କେନ୍ଦୁଝର, ସୋନପୁର, ସମ୍ବଲପୁର, ବରଗଡ, ଝାରସୁଗୁଡା, ମାଲକାନଗିରି ପ୍ରଭୃତି ଅଞ୍ଚଳରେ ସ୍ବେଚ୍ଛାସେବୀଙ୍କୁ ନେଇ ଘରଚଟିଆଙ୍କ ପାଇଁ କୃତ୍ରିମ ବସା ସ୍ଥାପନ କରିଛନ୍ତି | ଘରଚଟିଆଙ୍କ ସଂରକ୍ଷଣ ପାଇଁ 2015ରେ ତାଙ୍କୁ ମୁମ୍ବାଇରେ ପୁରସ୍କୃତ କରାଯାଇଛି | ଚଳିତବର୍ଷ ରବୀନ୍ଦ୍ର ତାଙ୍କ ଟିମ୍ ସହିତ ଗଞ୍ଜାମ ଜିଲ୍ଲାର ବିଭିନ୍ନ ସ୍ଥାନରେ 10ହଜାରରୁ ଅଧିକ ତାଳଗୋଟମା ରୋପଣ କରିଛନ୍ତି | ଜୀବଜଗତ ପ୍ରତି ତାଙ୍କର ଏହି ଅବଦାନ ପାଇଁ 2022ରେ ରବୀନ୍ଦ୍ରଙ୍କୁ ରାଜ୍ୟସ୍ତରୀୟ ବିଜୁ ପଟ୍ଟନାୟକ ବନ୍ୟପ୍ରାଣୀ ପୁରସ୍କାର ମିଳିଥିଲା | ନିକଟରେ ବ୍ରହ୍ମପୁର ବିଶ୍ବବିଦ୍ୟାଳୟ ତରଫରୁ ତାଙ୍କୁ ଗ୍ରୀନ୍ ଆମ୍ବାସାଡର୍ ପୁରସ୍କାର-2024ରେ ସମ୍ମାନିତ କରାଯାଇଛି |